El conceichu de Cangas del Narcea alcuéntrase nu Suroucidente asturianu. Iá'l mayor de toda Asturies con 823 km2. El sou relieve iá muitu accidentáu ya gribiu con fondísimos val.les l.labraos polas perselinas auguas de los milenta afluxentes del rigu Narcea, ya nas súas fasteras, nas que nun son mui avesidas, tán las viñas canguesas sobre una base de pizarra ya unos cordales de cuarzu.

Con un clima templáu ya chuviosu con abondas xiladas hibernales ya branos templaos, iá en Cangas del Narcea aú'l Paradisu Natural que representa Asturies algama la súa espresión más cimera. La bayura n'animales xabaces inxebres ya la bárbara masa forestal ya vexetal nun tienen igual n'España. Asina la Reserva Biolóxica Integral de Muniel.los (el rebol.léu más grande d'Europa Oucidental), el Parque de las Fontes del Narcea ya Ibias, ya la Reserva Parcial del Cuetu d'Arbas son los másimos esponentes del paradísu natural.

Camiéntase que foi l'Imperiu Romanu l'aniciador del semáu de la vide n'Asturies pos l'agricultura romana se basaba na afamada triada: olivu, pan ya vide.

De lo que sí tamos ciertos anguano, iá de la presencia de viñas en tierras astures na Baxa Edá Media. Nesta dómina yeran los monxos los más avezaos al cultivu de la vide. Asina, los benediitinos del Monesteriu de San Xuán de Courias, conocíu como "l'escorialín asturianu", l.levanon la mayoría de las tierras l.labratibles del Suroucidente asturianu hasta'l sieglu XIX onde precisamente anguano se paña la uva de Cangas (Cangas del Narcea, Ibias, etc).

La epidemia de Filosera cuasi acaba conu cultivu de la vide na nuesa tierra, pero'l procuru d'unos poucos artesanos caltuviénonlu vivu dica güei cuando l'emburrie de los productores ya l'afitu popular iden algamando una renacencia del vinu de Cangas plantando ya rexenerando cepas, amechorando los controles de calidá ya l.logrando reconocencias alministrativas como l'algamáu marchamu de Vinu de la tierra que s'espera sía l'antoxana de l'al.lampiada Denominación d'Orixe del Vinu de Cangas.

El vinu de Cangas iá un vinu tinto de tastiu fuerte, ya color vivu yema en rama, natural dafeitu, nuovo ya vivo. Na súa el.laboración empléganse las variedades d'uva Carrasquín, Mencía, Berdechu ya Albarín tinto.

El vinu furmienta al fríu de la xilada asturiana, sin amesta-y conservantes nin aditivos.

Tradicionalmente bebía ya bébese nunos concos de madera chamaos CACHOS. Pa felos emplégase la madera de nocéu ou bidul que iá cocida nas propias tinas onde formentanon los mostos. El cachu l.lávase con vinu (nunca con augua pa que nun s'enl.lente ya medren mofos). Del mesmu cachu beben del.las personas polo que'l sou usu quedaba namás pa los familiares ya amigos más cercanos siendo un sinceiru reconocimientu al convidáu el deixa-l.ly beber del cachu la casa.Desd